Евгений Козлов (Евгений Валериан)
(Род. 18 мая 1960 года в деревне Эжолты Усть-Вымского района Коми АССР).

Из Владимира Цивунина:
    • «К вечеру всегда усиливается тревожность...»
    • «От любви до любви не провал, ну а всё же потери...»
    • «Поздняя радость. Доверчивый свет...»
    • «Трава под окнами всё гуще...»
    • «Постигающий тайны — так нужно — постигнет не много...»
    • Ожидание
    • «Потом остаёшься наедине с памятью. Многое...»
    • «Толпа завистлива и лжива...»
    • «Легко говорить с дождём...»
    • «Недолги дни багряной желтизны...»
    • «Пятнадцатое марта. Снегопад...»

(Перевод на коми - Евгения Козлова)
------------------------------------------------------------------------------------



* * *

Рыт кежлӧ —
                      майшасьӧм поздысьӧ, дзугыльмӧ лов,
А шуд кылан руыс
                          тӧдлытӧг пакталӧ-сылӧ.
Сё пӧвста виччысьӧм —
                                    нэмтӧ кӧть мыйыськӧ пов —
Колялӧ ассьыс лӧсасъяс
                                      сьӧлӧм вылӧ.
Вермас лоны —
                        тайӧ сӧмын вежӧрын?
                                                          Ог тӧд,
Но дона морттӧ киӧдыс
                                  мый вынсьыд кутан да педзан.
Олӧмыс сэтшӧм кузь —
                                    аслыд эскыны он мӧд,
Мый верман помтӧг кутны вот тадз,
                                                          и — лэдзан...



* * *

Ӧти муслунсянь мӧд дорӧ вуджиг пос кисьтан, и нэмыс,
Мый тэ мӧдыслы вичмӧдан, воддзасӧ удзӧдан сiйӧн.
Ловтӧ восьтан, но сы пыдди овмӧдчас войдур ^[1] кодь пемӧс.
Мыйӧн вердны да удны он тӧд, кыдзи малыштны киӧн.

Сiдзкӧ, артмӧ — мый тадзикӧн весиг и сiйӧс тэ пӧдтан,
Либӧ, ловйӧн кӧ кольӧ, то ланьтӧдчас пельӧсӧ рама.
А ӧд шуӧма вӧлi нин: «Радейтӧй ӧта-мӧдтӧ!»
Абу тырмымӧн... Радейтныс огӧ и сяммӧй.

^[1] Войдур — войын кыйсьысь варыш; шыш, пышъялысь.

* * *

Сёръя лов кыпавлӧм. Ыпнитлан здук.
Олана керка да ывлаӧ ӧшинь.
Лунъясыс чинӧны дзоридз моз тшук,
Тулыснас босьтлӧм моз. Гожся лун чӧжӧн
Кодӧс он казьтыштлы. Вунлӧ. Ӧд сэк
Туӧ и вежӧдӧ ваыс и вӧрыс.
Ачыд тшӧтш ловзьылан. Шогавны грек,
Олӧм кор пуӧ — а мичыс! а кӧрыс!

Шондiбан олӧмӧй, шань тэ и бур.
Радлыныс дыш нин, да чеччӧдан мырдӧн.
Эз кӧ гаж бырӧмыс мыччӧдлы сур:
Шӧпкӧдӧ-вордӧ, важ лӧсасӧ пыртӧ,
Кытi ми ветлiм нин, пыдзралiм лов...
Майшасьӧ сьӧлӧм...
                                  Но дузӧм ог чӧжӧй:
Тырмӧ лов кыпавлӧм — радлы да ов.
Олана керка
Да ылiӧ ӧшинь.



* * *

Веж турун пуркйӧ ӧшинь улын.
Му вылас ыджыдалӧ юль.
И лунтыръясӧн тополь пулӧн
Сук вуджӧр серпасалӧ тюль.

А жырйын дзоридз дукӧн ӧвтӧ.
И бобув-юрсигусь моз дзик
Дась кывбурӧн нин аддзан мӧвптӧ,
Оз ковмы весиг черновик.



Кык олӧм

1.
Гуся вежӧртас корсьысь — сiдз шуӧма — кадсӧ пӧ воштас.
Коркӧ пи сылӧн быдмас, да сылы на вичмӧдас пай.
Аслыс ичӧтик помка и тырмас, мед лолыштiгкоста
Тайӧ олӧмсьыс воштысьны, олӧм кӧ гажсӧ оз вай.

2.
Дзескыд йи улын узьысь принцесса моз мездысьсӧ виччысьӧ шор.
Сылӧ ньӧжйӧник лым. Войтва колипысь ньӧти оз кольччы.
Пессьӧ асныра олӧм, веж гаръясӧн лунысь-лун польдчӧ,
Тӧв йыв парусӧн воссьыны тэрмасьӧ медводдза кор.



Виччысьӧм

Мый кӧсъян, дерт, воас. Но бергӧдчан — гожӧмлы пом.
А виччысян доныс? А мунӧмлы помкаыс мыйын?
Тадз вежӧртӧ песан, тадз ланьтан да корсян на ком ^[2]
И эскан, мый шудтӧ кӧть бӧжӧдыс лэбач моз кыян.

Тадз станция кольӧ — мӧд станция виччысян, тадз
Лов лӧньӧмӧн кыйӧдан ӧшиньӧд котӧртысь серпас:
Морт оланiн лэбыштӧ. Вӧр дiяс кывтӧны надз.
И чайтсьӧ, мый олӧмыс — татшӧм жӧ вералысь пертас.

Быд сувтланiн — чут, а кык чут костын — оръясян визь,
Дерт, пудъясьысь олӧмлы, чайта да, тадзи и колӧ.
Енвевтыс да ентасыс сӧльнитчӧ, шондiыс — кизь...
Син доймытӧдз дзорган и синваыд чепӧсъяс солӧн.

Выль станция волас да тшын-буснас пальӧдан лов
Да ки-коктӧ песыштан — кутшӧма мудзсьӧма, енмӧй!
И мустӧм вагонӧ бӧр пыран, и мӧдтор оз ков,
И дубалӧм вир-яйнад ляскысян тiралысь стенмӧ.

^[2] Корсьны ком — виччысьны лӧсялана здук.

* * *

Коркӧ сэсся кольӧ сӧмын казьтывны. Унатор
Аддзан сэтшӧмӧн жӧ, мыйысь шогӧдлiс войдӧр,
Сӧмын дзик ӧти вежсьӧм: лун либӧ вой, да кӧть кор,
Кытчӧкӧ воштысис вуджӧрыд — вӧлi ӧд лачалӧн ортӧн.

И мед лачаяс кувсьӧны оз кӧ нин медся водз,
Век жӧ ёна водзджык миянлӧн чайтӧм серти,
И кольӧ на бӧрын оз вируля сӧнъяса шодз ^[3],
А олӧмсьыс мудзӧм — мый тэнӧ дзик нинӧмӧ кертiс.

Дерт, шуны кӧ, сы вылӧ-й олӧмыс, быттьӧ синтӧм гут,
Медым нӧйтчыны ӧшиньӧ — ловсӧ тай вежас да выльӧн,
Быттьӧ сьӧкыд вежӧртны — да нинӧм сiйӧс оз кут!
И мӧдарас абу бурджык, сэн олӧмыс — абу нин сылӧн.

^[3] Шодз — (танi) би весьтын чишкалан яй.

* * *

Морт котыр завидьлунӧн ойдӧ,
Кор юкӧ йӧзӧн чӧжӧмтор.
И ёрта-ёртсӧ кывйӧн дойдӧ,
Сiдз нетшкӧ — сӧптыс чуть оз ор.

Кор «кыйдӧснас» нин гортас довгӧ,
Морт шаньмӧ, косьӧ оз нин пыр.
Ме бурася жӧ усьлӧм ловкӧд:
Мед...
Гашкӧ, челядь — керка тыр.



* * *

Зэр шӧпкӧмысь шойччӧ юр,
А йӧз костын ставсьыс мудзан.
Час квайтъясын садьмыны бур —
Лӧз вӧртассӧ ловнад сэк судзан.
И аскӧдыд босьтны нянь,
Мед лэбачӧс туйын вердны.
Сӧдз ру пырыс мунны шань
И ылысса тӧдтӧмас бердны.



* * *

Зэв регыд кежлӧ баситчылӧ ар.
А сэсся лӧня сувтас енмыс водзӧ.
Сэк ӧшинь улас вой тӧв петас, яр
Да ыкша: он тӧд, мыйысь босьтӧ водзӧс?

И ыстас кӧдзыд зэръяс — пом ни дор,
И абу гажтӧм нин, а ловтӧ пӧдтӧм...
Ми водам водз, да водзвыв нин и тӧдам,
Мый аски лоӧ сьӧлӧм вылын нор.

И дасьтысям ми кузя тӧвйӧм кежлӧ
Да корам нин, мед воас Пӧкрӧв лун:
Сэк мывкыд вӧр-ва вылыс мыгсӧ вежас
Да ланьтас, быттьӧ уджсьыс мудзӧм тун.



* * *

Веж турӧб. Март дас витӧд лун...
И пилы козьналӧм велосипед
Кӧть мортсӧ шызьӧдiс, тыр шудсӧ эз на сет.
...А сiдзсӧ мый нӧ — ньӧжйӧникӧн олам,
Ог вывтi лёка, кӧть он шу, мый бура.
А вермим эськӧ бурджыка. Ӧд збыль...
Но кӧть нин сыысь колӧ шуны аттьӧ,
Мый талун дона мортлӧн чужан лун.
Со тадз кӧкъямыс во сайын друг вежсис
Став олӧмӧй: юр вежӧр пыр на гуга,
А мӧдарӧ кӧ — со тай менам шудыс.
И тӧждлуныс.
О енмӧй, сӧмын кора —
Шань ловсӧ менсьым ӧтдортны эн сет...

(Вуджӧдiс Евгений Козлов)*

______

* Журнал «Арт», №3, 2010 г.

-----------------------------------------------------------------------------

«Рыт кежлӧ...»
«Ӧти муслунсянь мӧд дорӧ вуджиг пос кисьтан, и нэмыс...»
«Сёръя лов кыпавлӧм. Ыпнитлан здук...»
«Веж турун пуркйӧ ӧшинь улын...»
Кык олӧм
Виччысьӧм
«Коркӧ сэсся кольӧ сӧмын казьтывны. Унатор...»
«Морт котыр завидьлунӧн ойдӧ...»
«Зэр шӧпкӧмысь шойччӧ юр...»
«Зэв регыд кежлӧ баситчылӧ ар...»
«Веж турӧб. Март дас витӧд лун...»