«Лолын быдтыны вӧр-пу кор...» *
Сыктывкарса поэт Владимир Цивунинлы тавося май 10 лунӧ тырис 60 арӧс. Май 15 лунӧ И. Куратовлӧн литература музейын вӧлi сылӧн творчестволы сиӧм рыт. Владимир Ивановичкӧд аддзысьлыны волiсны ёртъясыс — коми да роч гижысьяс, литература туялысьяс, лыддьысьысьяс — ставныс, кодъяслы дона поэт да сылӧн творчествоыс.
Кыткӧ серамсорӧн, кыткӧ стрӧга поэт висьтасис челядьдыр да бать-мам йывсьыс, казьтылiс, кор да кыдз гижӧма медводдза кывбурсӧ, кӧнi сiйӧс йӧзӧдӧма, юксис талунъя литература йылысь аслас мӧвпъясӧн. Таысь кындзи сiйӧ лыддис ассьыс, а сiдзжӧ коми поэтъяслысь роч кывйӧ вуджӧдӧм кывбуръяс.
Чужис Владимир Цивунин Сыктывкарын 1959 вося май 10 лунӧ. Шӧр школа помалӧм бӧрын сiйӧ уджалiс наукаяс академиялӧн Коми филиалса Биология институтын, служитiс армияын, сэсся велӧдчис Сыктывкарса университетын химико-биологическӧй факультетын. Университетысь мунӧм бӧрын дыр кад чӧж уджалiс типографияын печатник-ротационерӧн, войся сменаӧ печатайтiс «Югыд туй», «Красное знамя», «Молодёжь Севера» газетъяс. 1990-ӧд воясӧ гижысь велӧдчис Москваса А. М. Горький нима литература институтын. Сэк жӧ корреспонденталiс республикаса радиоын, дасьтiс коми гижысьяс йылысь уна передача, мыйкӧ дыра уджалiс «Эскӧм» газет редакцияын. Бӧръя кызь восӧ сiйӧ дасьтӧ (верстайтӧ) компьютерӧн газетъяс, журналъяс, небӧгъяс.
Рочӧн кывбуръяс гижны Владимир Цивунин босьтчис 1980-ӧд вояс помын, йӧзӧдлiс найӧс республикаса да Россияса газет-журналын, ӧтувъя сборникъясын, лэдзис куим асшӧр кывбур чукӧр: «До снега» (1992), «Время листьев» (1992), «Имена всех живущих» (2001). Сiйӧ — вына сьӧлӧмкылӧма, джуджыда мӧвпалысь, дженьыд, стӧч кывбуръясас лов олӧмсӧ восьтыны сяммысь поэт-лирик. Гижӧдъясыс сылӧн пырджык мӧвпаланаӧсь, овлӧ, и норӧсь, морт олӧм да кулӧм йылысь думыштчанаӧсь, кыдз тайӧ, аслас медрадейтана, кывбурыс:
Опадают тихо листья,
Лишь едва-едва шурша.
Небо с каждым днём всё мглистей,
И грустит, грустит душа.
Но в печальный миг осенний
Принял словно благодать
Я умение растений
Тихо-тихо умирать.
Владимир Иванович — абу сӧмын кывбур гижысь, но и енбиа, зiль вуджӧдчысь. 1990-ӧд вояссянь заводитӧмӧн да торйӧн нин бӧръя воясас сiйӧ вуджӧдiс роч кывйӧ вель уна коми поэт-прозаиклысь кывбур-висьтсӧ. Рочӧдӧм гижысьяс лыдын — Василий Лодыгин, Владимир Тимин, Александра Мишарина, Михаил Елькин, Евгений Козлов, Александр Ульянов, Иван Ногиев, Надежда Павлова, Нина Обрезкова, Анжелика Елфимова.
Но медъёна вуджӧдчысьлӧн сьӧлӧмыс сибалӧ том авторъяслӧн гижӧдъяс дорӧ. Сiйӧ вуджӧдiс нин Ольга Баженовалысь, Татьяна Кирпиченколысь, Алёна Старцевалысь, Алёна Шомысовалысь, Любовь Ануфриевалысь, Татьяна Шаховалысь, Анастасия Бушенёвалысь, Анастасия Дёминалысь, Ксения Кармановалысь кывбур-висьтсӧ. Тшӧкыда на пӧвстын паныдасьлӧны гижан уджӧ сӧмын на босьтчысь, лыддьысьысьяслы абу ёна тӧдса, либӧ, мӧдарӧ, гижан уджысь мый вӧсна кӧ ӧтдортчӧм авторъяс.
1990-ӧд вояс шӧрсянь Владимир Цивунин вуджӧдӧ и менсьым кывбуръясӧс. Сэк, кор рочӧдiс медводдза кыксӧ, ме велӧдчи университетын мӧд курсын, сӧмын на жӧ заводитi гижны да вуджӧдчысьыскӧд весиг эг на вӧв тӧдса, дай эг чайт, мый менсьым, том мортлысь, кодкӧ босьтчас вуджӧдны кывбуръясӧс.
Владимир Ивановичлӧн тайӧ уджыс ёна воис сьӧлӧм вылӧ, да и ӧнi на чайта: сiйӧ бура гӧгӧрвоӧ менсьым мӧвпъясӧс, сьӧлӧмкылӧмӧс, сiйӧс, мый кӧсъя висьтавны кывбуръясын. Татшӧмӧн, ме серти, и колӧ лоны вуджӧдчысьлы.
Сэсся Владимир Цивунин эз нин ӧтчыдысь вуджӧдлы роч кывйӧ менсьым гижӧдъясӧс да пыр вӧчлiс тайӧс видзчысьӧмӧн, унаысь мекӧд сёрнитӧм-стӧчмӧдӧмӧн, кывбуръяслысь форма, ритм, образъяс, сьӧлӧмкылӧм вежлавтӧг кольны зiльӧмӧн.
А сылӧн менсьым «Кор лымйыс муас надзӧникӧн усьӧ...» кывбур вуджӧдӧмыс — менам радейтанаяс лыдын:
Когда снегами землю укрывает,
Тогда она спокойно засыпает.
Что видится ей в снах её чудесных —
Нам неизвестно...
Но утром, в предрассветный час, я слышу,
Как птичьи крылья хлопают о крышу,
Как под окном рябины меж собою
Давно опавшей шепчутся листвою,
Как ветерка игривое волненье
Легко разносит запахи сирени...
Тогда я знаю, как под снегом спится
Моей земле и что ей, доброй, снится.
Тшӧкыда кывлан: художествоа гижӧд вуджӧдысьлы пӧ абу быть тӧдны кывсӧ, код вылысь вуджӧдчӧ — позьӧ вӧчны тайӧс подстрочник (буквальнӧй перевод) отсӧгӧн. Но Владимир Иванович тадз оз чайт. Коми бать-мамлӧн пи, сiйӧ, кыдз и карын быдмӧм уна йӧз, оз сёрнит комиӧн. Та вӧсна, мед бура гӧгӧрвоны вуджӧдан гижӧдсӧ, босьтчис пыдiсянь велӧдны коми кыв — некымын во нин ветлӧдлӧ кыв велӧдан курсъяс вылӧ, лыддьӧ гортас коми газет-журнал, небӧгъяс, а неважӧн видлiс весиг ачыс комиӧдны некымын роч кывбур.
Коми поэтъяслы, кодъяс сетӧны йӧз киӧ ассьыныс гижӧмторсӧ, тайӧ, дерт, буртор: оз ков повны, мый вуджӧдчысь тэнӧ оз гӧгӧрво либӧ гӧгӧрвоас да вуджӧдас оз сiдз. Меным та кузя мойвиис: коми кыв гӧгӧрвоысь-тӧдысь вуджӧдчысьыс олӧмын кык — Владимир Цивунин да Татьяна Канова.
Музейын рыт нуӧдiгӧн поэт нориника кывкӧрталiс, эз пӧ артмы олӧмӧй сiдз, кыдз кӧсйыссис. Гашкӧ, сы вӧсна, мый дыркодь нин оз гиж кывбуръяссӧ, оз йӧзӧд ӧта-мӧд бӧрсяыс кывбура небӧгъяс, гежӧдика петавлӧ йӧз дiнӧ, а петавлiгъясас векджык пукалӧ кӧнкӧ ылi пельӧсын да чӧв олӧ. Дерт, гижысь мортыдлы тайӧ коланатор, и абу кӧ, дерт, усян шогӧ.
Но ме чайта, шудыс Владимир Цивунинӧс век жӧ эз ӧтдорт. Олӧм шудыс сылӧн сыын, мый морӧсас нӧйтчӧ ловъя, бур, шань мортлӧн сьӧлӧм, кодi кылӧ да гӧгӧрвоӧ оз сӧмын ассьыс, но и йӧзлысь шог-радлунсӧ, кужӧ майшасьны на вӧсна, шудыс сыын, мый батьыскӧд пыр орччӧн верстяммӧм нин Алёша пиыс, да сыын, мый олӧм чӧжыс муса да радейтана сылы литература, поэзия:
Всё — приходит... Пора успокоиться.
Всё сбывается. Сбудется.
Золотая рублёвская «Троица»
Никогда не забудется.
Голова от печалей туманится.
Страшно с временем меряться.
Но душа ещё к небу протянется,
Подрастая, как деревце.
А когда перейдёт тот предел она,
Где ничто не меняется,
Вдруг увидишь, что всё тобой — сделано,
И надежда — сбывается.
Алёна ЕЛЬЦОВА.
Снимокъясыс авторлӧн.
------------------------------------
* «Коми му» газет. 2019 вося май 23 лун.